Dikur sëmundja gati ia pamundësoi shkollimin, sot botoi librin “Guxo”

Sot doli nga shtypi libri i parë me poezi i autores së re nga Kosova, Blerina Murtezi, i titulluar “Guxo”. Libri është prodhim i shtëpisë botuese “Atunis”.

 

Përmes këtij libri, autorja shfaq veten dhe gjithçka në të cilën ajo beson, ëndërron e shpreson.

“Ky libër më përfaqëson mua, kujtimet dhe dhimbjet, humbjen e më të shtrenjtit tim vëllaut, e që nga ajo humbje mora forcë e guxim të shkruaj për çdo gjë që kalova e çdo sfidë që përjetova. Dhimbja as nuk pushon as nuk ndalon por ajo të bën saqë ti edhe vrapon”, shprehet autorja.

 

Libri “Guxo” shtjellon tema të ndryshme dhe synon të trokasë në ndërgjegjen e shoqërisë sonë mbi dukuri e situata të ndjeshme nëpër të cilat kalon secili njeri nëpër faza të ndryshme të jetës, përfshirë këtu edhe humbjen e më të dashurve, por edhe guximin e tejkalimit të sfidave me të cilat na përballë jeta, ashtu siç e përballi autoren e librit, e cila tash e disa vite vuan nga Distrofia Muskulare, sëmundje kjo që e ka lënë në karrocë.

 

Edhe përkundër të gjitha sfidave dhe vuajtjeve, Blerina është ngritur për të mos u rrëzuar më kurrë, e ka shndërruar dhimbjen në forcë e forcën në art, kurse artin e ka vënë në shërbim të forcimit dhe komunitetit dhe shoqërisë.